Иран президенті Масуд Пезешкиан АҚШ пен Израильмен қақтығысты тоқтатудың шарттарын атады
Иран президенті Масуд Пезешкиан АҚШ пен Израильмен қақтығысты аяқтаудың негізгі шарттарын атады. Оның айтуынша, бұл шарттарға елдің құқықтарын мойындау, өтемақы төлеу және қауіпсіздік кепілдіктерін қамтамасыз ету кіреді.
Пезешкиан бұл туралы сәрсенбі, 11 наурыз күні X әлеуметтік желісінде жазды.
«Ресей мен Пәкістан көшбасшыларымен сөйлесе отырып, мен Иранның өңірдегі бейбітшілікке адалдығын тағы да растадым. Сионистік режим мен АҚШ бастамашы болған осы соғысты тоқтатудың жалғыз жолы — Иранның заңды құқықтарын мойындау, репарациялар төлеу және болашақ агрессияға қарсы берік халықаралық кепілдіктер», — деп түсіндірді Пезешкиан.
Бұған дейін бірнеше сағат бұрын АҚШ президенті Дональд Трамп Иранға қарсы әскери операция жақын арада аяқталуы мүмкін екенін мәлімдеді. Оның сөзінше, «соққы жасауға арналған мақсаттар іс жүзінде қалмаған».
Ақ үй басшысы Axios-қа берген сұхбатында соғыстың «өте жақсы өтіп жатқанын» айтып, АҚШ-тың жоспардан едәуір озық келе жатқанын атап өтті. Сонымен қатар Трамп Иранға үлкен зиян келтірілгенін жеткізді. Президенттің пікірінше, Тегеранның дұшпандығы тек Израиль мен АҚШ-қа ғана емес, Парсы шығанағы елдеріне де бағытталған.
