2026 жылы Астана мен Алматыда 9 Мамырға орай ҰОС ардагерлеріне төлемдер бөлінді
2026 жылы Астана мен Алматы әкімдіктері 9 Мамырға орай Ұлы Отан соғысы (ҰОС) ардагерлеріне біржолғы әлеуметтік төлемдер бөлді. Төлем алғандар саны мен төлем мөлшерлері туралы мәліметтер жарияланды.
Астанадағы төлемдер
Астанада әлеуметтік төлемдер 2023 жылғы қазанда бекітілген қалалық мәслихат қағидаларына сәйкес ұйымдастырылды. Қала әкімдігінің мәліметінше, 9 мамырға орай біржолғы әлеуметтік төлемді 3398 адам алды.
Төлем мөлшері 64 мың теңгеден 5 миллион теңгеге дейін өзгерді. Ең жоғары төлем — 5 миллион теңге — бір ҰОС ардагеріне берілген.
Қалған санаттар бойынша төлемдер мынадай тәртіппен бөлінді:
- 45 АЕК (194 625 теңге) — ҰОС ардагерлеріне жеңілдіктері бойынша теңестірілген 476 адамға (ұрыс қимылдарына қатысушылар, қоршаудағы Ленинград тұрғындары және бұрынғы концлагерь тұтқындары);
- 45 АЕК (194 625 теңге) — Ауған соғысына қатысушылардан басқа, өзге мемлекеттердегі ұрыс қимылдарына қатысқан 1167 ардагерге;
- 15 АЕК (64 875 теңге) — тыл еңбеккерлері мен қаза тапқан әскери қызметшілердің отбасыларын қоса алғанда, 1753 адамға.
Астана әкімдігі жергілікті бюджет есебінен ҰОС ардагерлері мен оларға теңестірілген санаттарға қосымша қолдау шаралары да көрсетілетінін хабарлады:
- тегін жол жүру,
- санаторий-курорттық емдеу,
- дәрі-дәрмекпен қамтамасыз ету,
- коммуналдық қызметтерге ай сайынғы өтемақы.
Алматыда кімдерге төлем қарастырылған
Алматы әкімдігі қаржылай қолдау 2023 жылғы 8 желтоқсандағы Алматы мәслихатының шешіміне сәйкес көрсетілетінін түсіндірді.
Құжатқа сәйкес, 1941–1945 жылдардағы Ұлы Отан соғысына қатысушыларға 5 000 000 теңге мөлшерінде төлем берілген.
Бұл тізімге мыналар кіреді:
- әрекеттегі армия мен флот құрамындағы әскери бөлімдерде, штабтарда және мекемелерде қызмет өткерген әскери қызметшілер;
- партизандар мен астыртын ұйым мүшелері;
- соғыс кезеңінде жарақат, контузия, мертігу немесе ауру салдарынан мүгедектік алған адамдар;
- Ұлы Отан соғысы жылдарында алған жарақаттар мен аурулар салдарынан мүгедектік белгіленген жұмысшылар мен қызметшілер.
Алматыда қанша адам төлем алды
Алматы әкімдігінің мәліметінше, біржолғы әлеуметтік көмекті 15 ардагер алған.
«2026 жылы Алматыда аталған санаттағы азаматтарға төлемдер мерзімінен бұрын, сәуір айында жүргізілді. Біржолғы әлеуметтік көмекті Ұлы Отан соғысының 15 ардагері толық көлемде алды», – деп түсіндірді қала әкімдігі.
Бұған дейін қорғаныс министрінің орынбасары Асқар Мұстабеков 2026 жылы Қазақстанда 7 және 9 Мамырға орай әскери парад өткізілмейтінін мәлімдеген. Оның орнына елдің әртүрлі қалаларында, облыстарында және аудан орталықтарында мерекелік әрі әскери-патриоттық іс-шаралар ұйымдастырылатыны айтылған.
